【Now財經台】萬順集團控股(01746)今早(3日)復牌，股價大幅高開56%後，升幅一度擴大至1倍，高見0.66元，成交股數較過去100日平均大增22倍，成交金額逾800萬元。
集團喺農曆年廿九(1月28日)開市前停牌，之後喺港股收爐後宣布，持股75%嘅大股東張元通將出售所有持股，意味公司賣盤易手，交易對象係獨立第三方薛瀚，將會以京港發展有限公司(Asia Empire Development)嘅名義接收呢一批股份，但通告未有交代作價。
睇返技術走勢，萬順2018年上市，招股價0.52元，之後股價大部分時間「潛水」，又冇任何資本動作，雖然賣盤消息一度帶動股價上返水面，但之後又再「潛水」，後市要留意薛瀚最終出價有幾闊綽，交易可唔可以成事，再判斷萬順嘅未來。
