【Now財經台】農曆新年將至，港股今個星期只有1日半市，恒生指數今日(27日)喺期指結算日企穩20000點以上，除咗科技股，中字頭股份亦係升市功臣之一，上周內地多個部委開聯合記招，會上重申要求央企1年要多次分紅，並要提高分紅等，如果想賺息又賺價，係咪揀中特估比較好？港股唯一1隻追蹤央企嘅交易所買賣基金(ETF)係博時央企紅利(03437)，追蹤指數包括50隻唔同行業嘅央行，而能源公司佔近半，金融就只佔約2%，係唔係一個好嘅選擇？
獨立市場策略師何啟聰指，中字頭股份因應政府要求維持高派息，適合低風險部署。
至於博時央企紅利呢隻ETF，Ivan就指，呢隻ETF好處係追蹤指數多達50隻涉及唔同行業嘅央行，可以分散風險，容易追上市場表現。不過，50隻唔一定同時賺錢，可能會買入股價表現一般嘅股份，但若投資者睇好某個板塊發展，不妨直接投資係特定板塊嘅ETF。
