【Now財經台】截至早上11時止，過去1小時內《彭博》用戶搜尋量最多港股，依次為中國人壽(02628)、中國平安(02318)、新世界發展(00017)、碧桂園(02007)及復宏漢霖(02696)。
國家金監總局今早(23日)喺國新辦新聞發布會上指，第2批保險資金長期股票投資試點規模，唔會少1000億人仔，又預告農曆新年前會先批500億人仔，對內險股刺激作用有幾大？
椽盛資本投資總監曾永堅指，雖然內險股，尤其國壽及平保今日消息公布時，股價曾經衝高，之後升少一截，睇返過去兩星期，兩隻股份持續反彈，可能有投資者早已估到，又或者收到風中央會再出招，所以現價已反映咗呢啲因素。
佢又話，500億人仔對內險股整體正面影響有限，雖然政策會加大對A股嘅投資，但現時中國經濟結構問題仍困擾經濟前景，並投射喺股票市場，所以加大投資額反而有機會增加風險及不明朗因素，所以市場唔敢對內險股有太正面睇法。
