【Now財經台】信達生物(01801)股價今日(16日)早段一度靠穩，臨近中午收市開始轉弱，到下午更插水式急挫，一度低見28.65元，重挫逾14%，收市仍跌逾10%，報30元，成交股數較過去100日同時段平均增3倍。
近日利淡信達嘅消息包括合作伙伴美國藥廠禮來公司(Eli Lilly and Company)季績差過預期，兩家公司合作嘅減肥藥銷售遜預期，不過，如果信達股價真係受禮來季績拖累，反應就滯後咗1日，所以較大機會係同政策消息有關。
國家醫療保障局上周四(9日)召開《支持創新藥發展企業座談會》，除內地藥企、美國強生公司(Johnson & Johnson)、法國的賽諾菲(Sanofi)都有參與，會上醫保部門指要將創新藥納入保障責任。
昨日(15日)安徽省醫療保障工作會議提及2025年新任務，係要牽頭全國生物製藥聯盟採購，意味安徽省或加快納入更多創新藥入醫保目標，而集中採購嘅藥品降價幅度好大，2024年平均降價50%、60%，投資者要留意公司會唔會就股價今日大跌出嚟解畫。
股價方面，信達14天相對強弱指數(RSI)已落到25，現時已落到30元水平呢個長期重要支持位，就算今日一度失後，收市仍可力保不失。
