【Now財經台】網易(09999)推出嘅新遊戲《漫威爭鋒》(Marvel Rivals)，係同Marvel Games合作開發嘅多平台遊戲，帶挈網易股價近期強勢，今日(16日)已連升第9個交易日，點解《漫威爭鋒》表現會較都係網易做代理嘅遊戲做得好，係咪有潛在驚喜？網易股價曾經喺2023年底，受國家新聞出版署發布《網絡遊戲管理辦法》拖累，呢類企業未來係咪仍有政策風險？
信達國際研究部董事趙晞文指，《漫威爭鋒》算係市場期待嘅遊戲，據遊戲嘅創意總監透露，每6個星期就會推出新角色，係吊住玩家嘅癮，所以市場反應及玩家感受都係正面，可以保持到遊戲流水。
佢又認為，遊戲剛推出時，在線人數一定好多，若在線人數可以keep到，帶動遊戲流水增長，就會係一個潛在驚喜。
晞文續指，從事遊戲業務嘅企業，一向都有潛在政策風險，但對內地網遊中長期發展嚟講係一個健康拉動，加上2023年後應該有修訂稿，預期修訂稿會較初稿寬鬆，所以《網絡遊戲管理辦法》都有可能係潛在催化劑，唔需要太擔心。
