【Now財經台】知行汽車科技(01274)股價今早(15日)低開後，一度低見11.52元，跌5.2%，創新低，但約早上11時資金開始湧入，逐步推高股價，曾勁升25%，高見15.2元，收市仍升23%，報14.98元，全日成交金額逾1.7億元，成交股數較過去100日同時段平均增4倍。
集團主要經營自動駕駛系統及解決方案，早前都有參加「美國消費電子展2025」(CES 2025)，食正智能駕駛熱潮，自駕系統係大勢所趨，但要大規模量產仍需時，所以公司上市至今仲未有錢賺，毛利率亦唔係特別高，幾時先可將自研技術變成盈利，仍有待觀察。
技術走勢方面，14天相對強弱指數(RSI)落到30樓下，今日係超賣後出現技術反彈，係咪可以持續反彈，就要留意之後有冇正面消息。另一方面，公司已獲中證監發出H股全流通備案通知書，隨時為股價帶嚟壓力。
