【Now財經台】新世界發展(00017)股價已連跌10個交易日，累跌17%，成為跌浪第2長嘅港股，新世界今日(10日)再破底，股價今朝平開後，好快已轉跌，一度挫5.5%，低見4.4元，之後續於低位徘徊，暫時成交金額逾5100萬元。
集團前行政總裁馬紹祥喺2024年11月29日，在毫無預警下突然請辭，之後新世界股價不斷向下，一度累跌30%，市值最新跌至約112億元。滙豐證券估計，新世界淨負債近1300億元，如果計埋冇到期日嘅永續債，公司淨負債比率高達89%。滙證又話，如果本港樓市2025年仍然冇起色，新世界可能陷入資不抵債嘅困局。
股價方面，新世界9天相對強弱指數(RSI)已跌至10嘅極超賣水平，股價可唔可以回穩，就要睇母公司周大福企業會唔會出手打救新世界，又或者集團出售資產方面有冇進展。不過，美國候任總統特朗普(Donald Trump)上場，美國減息次數及幅度應該會減少，喺利息開支龐大下，新世界股價短線仍然唔樂觀。
