【Now財經台】截至早上11時止，過去1小時內《彭博》用戶搜尋量最多港股，依次為中遠海能(01138)、騰訊控股(00700)、融創中國(01918)、中國石油股份(00857)、紫金礦業(02899)。
消息指，山東省港口集團禁止被美國制裁嘅運油輪停泊，摩根士丹利認為，呢個舉動會利好中遠海能，美國候任總統特朗普(Donald Trump)上場後或會加大制裁力度，相信會成為運油商2025年主要正面動力，雖然中遠海能母公司近日被美國國防部納入「黑名單」，但中遠海能股價今日(8日)一度升逾10%，點解會出現呢個情況？
資深證券分析師彭偉新認為，中遠海能升得合理，因為油價回暖，加上石油需求冇之前預期咁差，以及石油輸出國組織(OPEC)成員國可能短期內會增加亞洲地區嘅供應，以及調低價格，所以中國向OPEC買油嘅機會更高，連帶運油設施需求都會上升，相信會利好有跟足美國制裁措施嘅運油公司。
Castor又指，中遠海能股價自2024年12月低位開始升返上嚟，雖然上影線長，但相信今日已出現突破，估計資金短期會繼續追入。
