【Now財經台】藥明生物(02269)向默沙東(MSD International)出售愛爾蘭疫苗設施相關資產套現，以提升資產效率及利潤，其實藥明生物財務狀況唔算緊張，計及5年內借貸總額、流動合約負債，集團嘅現金足夠應付有餘，加上公司2024年中期業績提及，愛爾蘭新設施處於上升周期，點解突然轉軚要賣呢項資產？
信達國際研究部董事趙晞文指，唔排除過去幾年嘅疫情影響咗設施營運，投資回報不似藥明生物預期，雖然集團去年上半年業績話愛爾蘭新設施處於上升階段，但上升速度都有快慢之分，公司嘅投入時間係疫情前，呢3年投入咁大資本，市場都擔心廠房將來全面完成建設後嘅爬坡進度，始終呢啲大型建設涉及好多資本開支及後續折舊，期間係冇收入貢獻，投入1個項目唔係只放嚿錢入去，相信藥明生物係考慮咗資本運用、盈利能力等因素，先會作出呢個決定。
