【Now財經台】家電股JS環球生活(01691)今日(6日)逆市大升，股價今朝高開近2%後，一直變動唔大，但去到下午約1點30分，買盤突然湧入，刺激股價一度抽高近40%，高見2.16元，衝上年半高位，但之後升勢回順，收市仍大升近15%，報1.78元，全日成交金額近6億元，成交股數較過去100日同時段平均激增38倍。
據聯交所權益披露顯示，JS環球主席兼大東王旭寧喺2024年12月30日，以溢價近28%增持3000萬股，持股量由約55%升至56%，市場認為係私有化前奏，因為另1隻家電股VESYNC(02148)，上周公布大溢價私有化公司後，帶動股價急升，令市場憧憬JS環球會私有化。
集團股價自去年10月初1.8元水平開始向下，股價上周一度跌至年半低位，低見1.24元，大股東趁低增持無可厚非，但用咁大溢價增持難免惹嚟揣測。
JS環球股價今日衝高後，投資者或者會覺得私有化純粹係一個揣測，加上基本因素又唔係太吸引，加上14天相對強弱指數(RSI)已上到71嘅超買水平，喺高位顯著回套，後市要留意後續有咩消息跟尾。
