【Now財經台】東陽光長江藥業(01558)今日(6日)高開逾6%後，升幅一度擴大至逾10%，高見10.28元，升上兩周高位，其後繼續喺10元水平上落，今日升勢亦有成交配合，暫時成交金額約1.2億元，成交股數約1170萬股，較過去100日同時段平均成交增9倍。
内地近日流感病毒陽性率持續上升，東陽光業核心產品係抗流感藥，因此，股份受資金追捧，其中，抗流感兒科生意佔比最大，2024年中期收入逾18.6億人仔，佔整體收入76%，市佔率則近65%，喺內地抗流感藥領域有領先地位。而集團其他業務基數較低，銷量增長顯著，去年按年錄60%至1.9倍嘅升幅，進入收穫期。
值得留意係，一般嚟講，本港每年第1及第4季都會爆發流感，睇返東陽光業股價，2023年第4季至2024年第1季末出現一波升浪，但之後就會回調，所以要留意2025年第1季嘅走勢。
