【Now財經台】過去1年，有逾50%半新股「破發」收場，即短時間內失守招股價，有會計師行估計，跟投資者傾向短炒獲利有關。
港股新股市場沉寂多時，終於在2024年見起色，更誕生新股「超購王」，不過，埋單計數，在2024年上市的70隻半新股中，有25隻首日掛牌已「破發」，即跌穿招股價，截至上周五(3日)止，仍逾半股價「潛水」。
超額認購倍數最勁的半新股中，上市不足1個月的草姬集團(02593)，股價已累跌近30%。
此外，公開招股超購逾5600倍的晶科電子(02551)上市已2個月，但股價仍未重上水面。
至於公開招股超購逾600倍的九源基因(02566)，股價上市首日已「破發」，至今已累跌近50%。
招股時一股難求的新股，上市後被嫌棄，是否跟投資者錯判形勢有關？
德勤中國合伙人、澳洲會計師公會理事呂志宏說:「『破發』或超購幾多倍呢幾樣嘢，好視乎嗰間公司集資嗰段時間嘅市場氣氛，同埋板塊嘅氣氛係點樣，第2，亦要睇要返個別公司估值嘅吸引性，當然，我哋依家見到喺港股市場，都係會集中喺一啲我哋叫短線投資，波動性亦會大咗。」
曾有散戶聲稱，因被超購數字誤導而入飛抽新股，德勤則認為，所有券商的活動均受證監會監管。
呂志宏說:「如果公布咗嘅數字來講，相信一定已經做咗Verify，亦Check過，並喺港交所有一定程度嘅流程，相信一定係準確。至於點解會有一個咁大嘅超購，其實過去你可能都留意到有啲股票，喺唔同年份亦都會有一啲『超購王』，因為當市場非常熾熱，股民對某啲股票或板塊特別有興趣，覺得嗰段時間會有一個升浪，就會一窩蜂去投資呢隻股票。」
對於美國新政府上場或令對華貿易衝突升溫，德勤認為，港交所(00388)能為上市企業提供較大確定性，企業或因而重返港股市場。
隨著中央鼓勵龍頭企業赴港上市，以及環球央行持續減息，將有利本港新股市場發展，估計今年將會有約有80隻新股，集資額介乎約1300億至1500億元。
