【Now財經台】名創優品(MINISO)(09896)近日宣布成為內地熱門遊戲《黑神話:悟空》官方合作伙伴，名創之前曾經同影視動畫知識產權(IP)有合作，今次係第1次同遊戲IP有搞作，值唔值得睇好？
紅蟻資本投資總監李澤銘指，今次合作可以進一步增加名創產品種類，《黑神話》就可以多咗1個銷售渠道，對雙方都有利，不過，雖然名創旗下多咗1款產品，但對整體估值及收入幫助未必好大，消息一出，刺激名創股價今日(3日)一度大升近14%，衝破50元關口，但有炒過龍之嫌，市場似乎係趁「谷子經濟」盛行，以及見同類股份泡泡瑪特(POP MART)(09992)股價喺2024年升咗幾倍，再加上近期熱爆新股，內地玩具股布魯可(00325)招股反應十分熱烈下，就順勢炒作名創，佢認為呢浸炒作唔會持續好耐。
