【Now財經台】毫子股51信用卡(02051)股價今日(2日)逆市向上，平開後，升幅逐步擴大，一度大升16%，高見0.28元，衝上近3個月高位，成交股數較過去100日平均增逾7倍，但成交金額唔算多，截至中午前僅逾140萬元。
集團噚日(1日)發通告，披露透過露營業務孵化嘅汽車業務，已取得顯著進展。集團早年因違法收數風波而退出P2P市場，2022年進軍內地大受歡迎嘅露營市場，頭半年收入逾700萬人仔，2023年全年升至3400萬人仔，貢獻整體收入逾15%，但業務未有錢賺之餘，又要面對市場口味開始轉變嘅問題。
睇返技術走勢，雖然51信用卡今日升穿所有移動平均線，但仲未可以確認出現突破，半日高位0.28元係近半年嘅橫行區頂部，相對強弱指數(RSI)都開始超買，未來要留意公司2025年3月底派發嘅全年成績表，睇下汽車業務交唔交到功課。
