【Now財經台】晶片股連日有炒作，5日合計，中芯國際(00981)係最多資金流出嘅個股，有2300萬元資金離場，股價再創兩個月新高，如果依家追好倉，有一批CALL價外15%，比較短身，2025年2月左右到期，但槓桿做到4倍，其他長身嘅價外CALL，槓桿約2倍，係咪高槓桿較值博？
滙豐亞太區財富管理香港上市產品銷售經理盧貴良指，中芯股價已連升7個交易日，累升23%，今日仍逆市向上，主要受惠於人工智能(AI)應用主題，成交比較活躍嘅CALL仲有兩個月就到期，有部分已價內20%，要留意短身CALL時間值耗損較快，至於已變價內嘅產品實際槓桿高，係因為對沖值拉高實際槓桿，當對沖值冇大升空間時，爆發力就會較細。
佢建議，可以留意較價外嘅條款，行使價40.5元，價外20%，2025年6月到期，實際槓桿約3倍，爆發力較價內產品大。此外，亦可以留意貼價牛證，可以考慮喺24元做收回部署。
