【Now財經台】理想汽車(02015)創辦人李想日前喺「2024理想AI Talk」活動上指，集團已變身人工智能(AI)公司，又話未來100%會做人形機械人，更預期2030年有機會推出AI跑車，佢嘅言論為市場帶嚟好大憧憬，帶挈股價今日(27日)急升，一度大升7.6%，更成功晉身「紅底股」， 公司發展AI業務有咩優勢？生產工業機械人係咪一項合理投資？
王道資本及家族資產管理執行董事黃敏碩指，理想應該會從研發方面著手，但佢認為，業務方面未必會跨界發展，依家市場最關注集團點樣引入AI產品、生態圈更普及點推廣AI，同埋喺汽車市場以外揾機會。
Michael續指，全部企業都希望喺工業機械人方面著手，因為可以節省人手，但亦要留意安全性及市場對產品嘅信任度，佢認為，理想同其他企業唔同，因為冇包袱，可以有更大想像及創意空間，不過，品牌本身未畀到市場好大信心，所以市場只會觀望，單靠企業自己做到應用落地，始終仲係有啲局限。
