【Now財經台】港股喺年底終於收復20000關，2024年收爐時，恒生指數有機會扭轉連跌4年嘅劣勢，依家市場正靜待應該喺明年3月召開嘅「兩會」，而「兩會」前會進入政策真空期，點睇港股2025年開局表現？係咪傾向睇淡？
勝利瑞柏基金管理合伙人暨投資總監陳建良估計，中央將因應農曆新年期間整體消費，以及春節假後復工數據做部署，若消費數據向好，就唔需要推咁多刺激政策，反之亦然，所以的確會進入一個相對冇討談空間嘅時間。
KL續指，估計恒指明年較大機會呈橫行格局，但同過往慢慢飄落去嘅橫行唔同，因為外資唔會喺經濟啱啱復甦後，就即刻投資港股及A股，所以佢認為港股明年唔會升好多，但亦唔會出現資金大舉流走或沽空嘅情況。
佢又預期，港股明年板塊輪動會幾明顯，唔同板塊會輪流炒上，而且係短線升完一浸就跌，所以較難捕捉政策市反彈，佢建議投資者明年僅適量參與，唔好太進取。
