【Now財經台】美國政府宣布調查中國製傳統晶片，晶片股連日有炒作，其中，中芯國際(00981)股價連升4日後，今日(24日)走勢反覆，但中芯股價已累積咗一定升幅，距離收回價約15%嘅熊證，槓桿5倍至6倍，如果想反手開淡倉值唔值博？收回風險高唔高？
獨立股評人黃偉豪指，短線嚟講，收回風險唔算太高，始終對比現價都有一段距離，但建議可以先睇一睇，可能中芯近期都升得比較多，令投資者想博一博，但依家利好因素唔多，投資者調轉炒可能因為覺得事件會加快內地自主研發，但要留意股價有機會回調。
Ravi又認為，投資者可以等聖誕假期後，睇下股價可唔可以突破30元，因為中芯股價喺11月至12月初，見到喺呢個水平有啲阻力，如果未來突破唔到30元關口，再考慮做反手部署會較好，若中芯股價可企穩30元，就會開始慢慢挑戰上一個高位，到時風險就會較大。
