【Now財經台】本港第1隻「18C」特專科技新股晶泰控股(02228)，今年9月10日納入港股通，正式生效當日股價飆22%，一度高見16.2元嘅上市新高，但之後不斷尋底，至今已累跌67%。晶泰上半年虧損擴大，加上負債重，股價最新喺4元樓下，要上返招股價5.28元係咪唔容易？至於第3隻「18C」特專科技新股，工業用機械手臂開發商越疆科技(02432)今日(13日)開始招股，招股價介乎18.8元至20.8元，籌最多8.32億元，點睇呢隻新股？
紅蟻資本投資總監李澤銘指，入港股通的確幫到晶泰股價，因為北水可以買，股價未來走勢要視乎市場偏好，同埋可唔可以扭虧為盈，令市場有返信心，股價先會有轉機。
Alan續指，越疆有足夠概念，市場最近亦熱炒工業協作機械人概念，喺人口老化下，市場對機械人嘅需求有增無減，尤其內地自動化生產速度加快，需要更大程度機械化。集資額方面，佢指出，雖然越疆集資額唔算大，但相信上市初期會有一波炒作，但同其他「18C」特專科技股一樣，雖然越疆收入有增長，但虧損亦按年擴大，未來要視乎公司盤數交唔交到功課。
