今朝開作戰室第一個msg見到其中一位戰友凌晨時段留言話佢好似生得，係呀，佢係一位準媽媽，而其他已為人父母嘅戰友紛紛留言，Call車、沖涼、食定嘢...準媽媽已經帶同戰友s嘅祝福一併進入醫院/產房，睇緊文嘅你，如果可以嘅話，都請你默默為呢位準媽媽送上祝福，感謝。(珍媽加油！)
恒指今朝開市跌158點，開市報20,238點，呢口價擺位將指數重新再靠近下方牛證，而以今日見嘅牛證街貨目前貨量係比上方熊證近又多，向下殺無話唔啱嘅。
如同平時一樣指數向住街貨方向走，10點未到已經將第一層牛證街貨20,100至20,199點嘅牛證全數收回，呢度有相當於104張期指，對比第二層嘅20,000至20,099點嗰606張期指，似乎呢個只係一個早餐。
噚日Plan借小時圖10/20線唔過而出淡倉，結果無啦啦過線；今日指數一個裂口已經將指數重新打返落去小時圖保歷加底線，Slow STC(14.3)兩線係向下，但9點55分見保歷加口未拓闊。恒指熊(63620)，收回價20550點，Pick20550呢個位收回皆因噚日見指數到20,500點左右見頂線，所以想進取少少，槓桿約44.9倍夠做DT架啦。
繼續望下隻滙控(00005)同隻滙豐牛(61423)，今朝股價隨大市下行，10點見股價低走於10/20線，股價做緊74.45元；而隻(61423)現價為0.042元，同噚日嘅平均買入價一樣。
今日星期五，話就話(61423)係放耐少少，但今日過夜就係過weekend兩日，如果大注嘅，數一有數收就先收，否則日線10線仍然借住先啦。
作者阿珊，以技術分析專心玩輪證，唔貪心，努力賺取我家肥貓罐罐。
