【Now財經台】美國總統當選人特朗普(Donald Trump)明年1月就再度入主白宮，特朗普曾揚言上任後就可以令俄烏停戰，到底佢係咪可以穩定世界大局？一直強調「美國優先」嘅特朗普，點評估未來幾年嘅中美關係？
思博資本高級合夥人張宗永指，唔同意特朗普可以穩定世界大局，佢上台會令孤立主義抬頭，雖然真係有可能令俄烏停戰，但唔代表長遠係安全，若只係停戰，唔係真正解除呢個威脅，仍會對歐洲構成危機，再加上特朗普係內政優先過外交，其他盟國有可能因此疏遠美國。
房委會資助房屋小組前主席黃遠輝亦認為，特朗普唔能夠穩定世界大局，佢形容呢種秩序只係基於強勢嘅軍事及金融力量，以巴、俄烏等戰事可能有機會停止，但與此同時可能引發其他危機，他對環球地緣政局仍然唔樂觀。
不過，兩人認為唔需要對中美關係過分悲觀，黃遠輝認為，美國對中國嘅態度有變，雖然「美國優先」一定會有影響，但由於市場本身對中美關係睇得好悲觀，反而唔排除會谷底反彈。
黃遠輝續指，美國現任總統拜登(Joe Biden)採取拉攏政策，令美國同盟友緊密合作，對中國構成更大威脅，特朗普則傾向美國獨大，可能會同歐洲盟友關係稍微疏遠，中國可趁機同歐洲打好關係，對經濟會有正面影響。
