【Now財經台】物流地產投資管理公司ESR(01821)日前獲主要股東喜達屋資本(Starwood)等財團，以每股13元提出私有化，ESR估值約552億元，有機會成為2021年以來，最大宗私有化交易，若小股東手持首次公開招股(IPO)貨，以IPO價16.8元計，可能要蝕讓，到底13元呢個私有價合唔合理？
安泓投資總監兼香港大學房地產及建設系客席副教授楊書健指，要判斷私有價格係咪合理，除咗睇帳面資產升跌，亦要睇其基金公司業務拓展速度，IPO價係2019年定下，疫情後爆全球加息潮，對同利率掛鈎嘅行業有較大影響，若利率長期喺高位徘徊，業務價值就會相應下降，雖然今次私有出價低過帳面值嘅14元，但之前收購亞太地區房地產資產管理公司ARA集團時，已經係帳面值反映咗，因此，13元嘅私有價係公平。
