【Now財經台】截至早上11時止，1小時內《彭博》用戶關注度上升最多港股，依次為新奧能源(02688)、萬科企業(02202)、阿里健康(00241)、新世界發展(00017)、ESR(01821)。
燃氣分銷股新奧今日(5日)跟大市跌，雖然公司冇乜特別消息，但仍登上榜首，可能同內地步入寒冬，多地啟動氣價聯動機制，天然氣需求進入旺季有關。滙證預期，新奧10月及11月天然氣零售銷售按年增長6%，增速快過今年首9個月，又引述新奧管理層話，有信心今年天然氣分銷業務可達致指引，即全年銷量升5%，毛利更升10%。
椽盛資本投資總監曾永堅指，住宅方面，天氣轉冷係市場對呢類公司業績有憧憬其中1個因素，尤其北方天氣一向寒冷，加上近年天氣反常，南方亦出現嚴寒天氣，令加家居天然氣使用量大增，不過，工業需求就達唔到市場預期，更成為拖累收益嘅主因，不過，內地地方政府之前容許天然氣加價，對抗成本上升，所以明年上半年業績有望改善，現時新奧股價喺51元有支持，若短期企得穩呢個位，有機會挑戰50天線，即54.8元水平。
