【Now財經台】2024年仲有約4個星期就完結，每逢呢個時候，大行、券商等來年股市預測就會排隊出場，最新輪到凱基比「投資貼士」投資者。
大市方面，預期恒生指數明年有機會升至23200點水平，但都有一個大前提，就係內地刺激經濟措施及成效要符合預期，同埋要力谷內需。
揀股方面，凱基就推薦3類股份，首先係可以受惠於中央救市新招，其次係對地緣政治敏感度較低，最後係積極拓展海市場嘅公司，又針對呢3類股比咗一個List散戶，總共有7隻股份，分別係攜程集團(09961)、比亞迪股份(01211)、招商銀行(03968)、中國平安(02318)、中國建築國際(03311)、騰訊控股(00700)及中國移動(00941)。
市場上呢類預測花多眼亂，散戶「做功課」時，不妨先Mark低呢啲預測，再慢慢篩選出自己最後嘅心水股。
