【Now財經台】地平線機器人(09660)股價今日(3日)平開，中午前股價一度挫近6%，低見3.99元，午後收復部分失地，收市報4.09元，跌逾3%。
地平線機器人上市剛「滿月」，大行報告開始覆蓋公司，睇法都幾正面，看好集團科技優勢、增長潛力等。目標價方面，以高盛睇得最牛，睇6.1元，其他大行普遍睇5元樓上，即較現價有近22%上升空間。
地平線機器人股價今日受壓，可能同近日市場再傳出公司出現重大人事變動有關，但其實呢個消息由上市開始傳到依家，市傳副總裁余軼南已離職，不過，余軼南本身唔喺董事局入面，冇持有主要股權，所以即使真係離職，都未必對公司有太大影響。
地平線機器人股價近期喺3.8元至4.5元水平反覆上落，近排危站招股價，到底高層「跳船」同公司未來投資有冇關係？公司係咪真係會有機器人？投資者要留意公司會唔會有進一步澄清，可能會為股價走向帶來新啟示。
