【Now財經台】法國總理巴尼耶(Michel Barnier)運用憲法權力，強行通過社會福利預算案，議會隨即提出不信任動議，引爆一場政治大危機，拖累法國股債受壓，10年債息仲高過希臘，令市場聯想起希臘之前嘅債務危機，喺呢個亂局下，法國債息會點走？法國又會唔會爆發債務危機？
羅家聰指，法國債息同外圍債息走勢相近，因為債息係反映環球通脹及避險意欲，而美國10年期債息最近抽升後見頂回落，可以帶動歐洲債息出現類似嘅走勢。佢又指，如果法國真係爆發債務危機，長債息會抽升至極高水平，短期債息亦都會喺短時間內夾高，繼而出現孳息率曲線倒掛嘅情況，不過，法國債息暫時仍未去到危險水平。
KC又話，依家法國經濟唔算差，財赤亦冇其他國家咁嚴重，只要法國內政有改善，法國嘅財政唔會惡化至嚴重水平。
