【Now財經台】內地上周公布最新國家醫保目錄談判結果，B仔股雲頂新耀(01952)股價今日(3日)一度炒高逾15%，高見46.8元，成交較過去100日平均增5倍，成交金額突破5億元。
獲納入醫保目錄嘅「耐賦康」係全球首款針對治療原發性免疫球蛋白A腎病(IgA腎病)嘅藥物，連同公司另1隻主打藥「依嘉」，帶動集團上半年收入增至逾3億人仔，按年飆約33倍，但公司暫時未有上調全年銷售目標指引，維持全年喺7億人仔嘅目標，意味著下半年收入會比上半年多最少逾30%。
技術走勢方面，雲頂新耀股價連續兩日炒高，今日突破近3年高位，升穿所有移動平均線，但14天相對強弱指數(RSI)暫時仲未過70，仍未超買，連開兩支大陽燭，後市留意有冇機會接力開第3支大陽燭。
