【Now財經台】高息股喺11月表現麻麻，只得3隻有得升，如果跌得相對少就有部分公用股，但拉長嚟睇，其實今年都有唔錯嘅升幅，係咪可以繼續持有？沽咗嘅係咪可以買返？
香港大學房地產及建設系客席副教授楊書健指，每逢憧憬減息就會買公用股，因為減息初期一定利好呢類股份，睇返今年以來回報，電能實業(00006)有13%，長江基建集團(01038)更逾20%，所以呢類股份其實幾好揸，股息率介乎逾4厘至約5厘，呢啲股份不論月供或長揸都完全冇問題。
至於現階段需唔需要換馬，Victor就話，睇返過去半年，陸續有一種係同系換馬，例如電能及長建換長和(00001)，如果咁樣換馬，明年預期收息會多咗，加上股息有機會增加，呢方面都有著數。
此外，美國候任總統當選人特朗普(Donald Trump)主張以關稅作為談判手段，而近期特朗普嘅口風似乎又有變，如果特朗普上任後，真係落實向其他國家加徵關稅，對息口嘅影響有幾大？
楊書健指，特朗普今個任期同2016年唔同，汲取咗上個任期嘅經驗後，今次揀內閣人選時，會揀一啲幫到佢更易推動政策及運作官僚系統嘅人選，當特朗普上任後執行關稅等政策時，可以更快落實到佢嘅政策。
佢又話，向其他國家加徵關稅會直接重燃美國本土通脹，有統計顯示，加徵10%關稅會令美國通脹升1%，間接令美國聯儲局減息幅度及速度會明顯減少，投資者要留意美國明年息口嘅走勢。
