【Now財經台】完美醫療(01830)上周五(29日)收市後出咗業績，雖然繼續派中期及特別息，但股價今日(2日)照插水，裂口低開逾5%後，跌幅一度擴大至逾11%，低見2.35元，成交股數較過去100日同時段平均增5倍，中午前成交金額逾600萬元。
完美醫療中期收入按年跌14%，純利亦跌15%，人均消費更加大跌近40%，公司解釋係受市場氣氛疲弱及港人北上消費等因素影響，拖累本港業務收入跌9%，由於內地需求少咗，內地收入更大跌20%。
業績唔掂，唯有繼續用派息留住小股東，中期息11.2仙，再派埋特別息0.1仙，派息比率連續10年超過100%，但對股價完全冇支持作用，其實計一計，雖然繼續派中期及特別息，但今次加埋係按年派少咗20%，業績唔好，股息又縮水，即使預測股息率仍超過10厘，股價都好難唔跌。
