【Now財經台】「唔賣又賣」嘅香港寬頻(01310)上月底畀中國移動(00941)睇中，提出初步出價想收購公司，市場即時認為公司好有機會落入中資手。不過，呢單收購今日(2日)有最新發展，香港寬頻今朝開市前突然停牌，市傳有另一個買家加入呢場爭奪戰。
據《彭博》引述消息指，私募股權公司I Squared Capital向香港寬頻提出非約束性收購要約，報道話出價高過中移動，但依家所有嘢仲傾緊，最終花落誰家仲係未知之數。
原來I Squared今次係「捲土重來」，去年3月，香港寬頻董事會曾經話收過I Squared一份初步非約束性函件，提及想同香港寬頻做一單可能涉及提出要約嘅deal，但去到6月唔知咩事又話唔傾了。
