【Now財經台】順豐控股(06936)昨日(27日)首日掛牌，最終平收完場，今日(28日)上市第2日更一度失守招股價，集團今次喺香港上市籌逾58億元，其中35%用嚟提升及優化內地物流網絡及服務，內地業務收入暫時佔整體約85%，但收入佔比最大嘅快遞業務，市佔率僅10%，加上有唔少大企業都有自家物流團隊，順豐未來增長空間係咪好有限？
耀才證券研究部總監植耀輝指，內地快遞公司選擇多，行業競爭一直好大，過去幾年經常傳出打價格戰嘅消息，即使經濟活躍令需求增加，但多出嚟嘅份額要好多公司一齊分，所以分到嘅數量都好少，加上近年大企業都有自家物流團隊，所以內地市場發展空間真係唔大。
Stanley續指，其實內地唔少快遞公司都係靠平搶生意，但包裝質量冇保證，雖然順豐包裝質量好，可信度又高，但成本相對高，而廠商一般都會用成本低嘅公司。佢又認為，內地快遞公司價格戰十分激烈，大家要鬥平，即使順豐今次上市集資嘅錢，將集資所得嘅錢只係用喺某個環節，足唔足夠或成效都有保留。
