【Now財經台】美國候任總統特朗普(Donald Trump)指，明年1月20日宣誓就任後，立即向中國進口商品加10%關稅，墨西哥及加拿大就徵收25%關稅，消息一出，出口股創科實業(00669)股價今朝(26日)低開逾0.4%後，跌幅一度擴大至逾7%，低見99元，其後收復大部分失地。依家創科北美市場客戶收入佔整體75%，集團近年都積極分散生產布局，內地及越南分別佔35%，墨西哥佔15%，特朗普嘅關稅政策對創科影響係咪好大？
信達國際研究部董事趙晞文指，生產力只係表面嘅數字，其實內地嘅35%之中，實際只有12%係出貨去美國，所以就算墨西哥嘅15%全部出產去美國，兩邊受嘅影響其實差唔多。佢又認為，由於創科分散生產布局，所以關稅問題對集團毛利率或後續關稅衝擊唔會太大。
晞文補充，2018年至2020年期間，創科毛利率按年有得升，反而兩大競爭對手美國創科同業史丹利百得(Stanley Black&Decker)及日本牧田(Makita)都要跌，反映同業受關稅嘅衝擊較大，而創科係靠同客戶保持良好關係及產品創新先稀釋咗關稅嘅影響。
