【Now財經台】中國高速傳動(00658)今日(25日)一度淪為毫子股，股價低開後，好快已失守1元關口，最多跌近15%，低見0.92元，不過，尾市有資金趁低吸納，收市報1.01元，跌逾6%，成交股數較過去100日同時段平均增2倍。
公司昨日(24日)出通告，指旗下3家全資附屬連同兩家附屬，喺2023年前後訂立咗商品買賣協議，但冇交代具體內容，最令市場驚訝係，據通告講，呢啲交易有應收款項及預付款項未收到，涉資高逾66億人仔，而交易係未經董事會批准而訂立。
依家高速傳動市值僅約15億元，如果最終應收款變壞帳，對公司嘅影響非同小可，雖然今日守得住1元關口，但都要留意住公司後續公布嘅調查結果。
