【Now財經台】今日(22日)有兩隻股份齊齊畀水掃高，分別係友寶在線(02429)及匯量科技(01860)。
先睇下友寶，股價今朝一度抽高逾23%，高見5.17元，成交相當大，暫時成交金額罕有逾5.8億元。集團去年11月上市，上市價10.35元，禁售股喺11月4日解禁，當日股價大冧逾50%，由10元直插5元水平。不過，今日大升就都搵唔到特別利好因素，睇今朝嘅買賣，北水都佔好多，截至昨日(21日)止，北水持倉約8.6%，未來要留意北水係咪會繼續積極增持。
至於交到靚業績嘅匯量，股價今個月大幅抽升，估值亦相應貴咗，相對強弱指數(RSI)亦出現背馳，有一定調整壓力，不過，喺北水力撐下，股價持續強勢，今日再升上逾3年高位，一度掃高近26%，高見9.75元。值得留意係，北水持倉周一(18日)只係約9.3%，但昨日已升至約11%，即過去幾日掃入近2%。
