【Now財經台】美團(03690)將會喺下周五(29日)出業績，股價近期都冇乜動力，今早(22日)一度跌逾2%，低見168.3元，有冇資金提前部署美團業績，但要下星五先出業績，明日(23日)又係周末，要用咩產品部署比較合適？
星展香港環球金融市場上市產品主管周國威指，今個星期有唔少資金趁美團股價回落至170元，買CALL輪部署業績，由於距離公布業績仲有1個星期，所以唔好揀太短身嘅CALL，因為時間值損耗高，引伸波幅亦較大。
佢建議，投資者可以揀明年3月底、4月初到期，較長身嘅CALL，引伸波幅較穩定，較適合部署美團業績。
