【Now財經台】早前，Tesla行政總裁馬斯克(Elon Musk)喺今次美國總統選戰出錢出力，力撐特朗普(Donald Trump)，呢位「頭號浸粉」亦成為大贏家，特朗普亦「論功行賞」，新設嘅「政府效率部」(DOGE)由馬斯克及企業家Vivek Ramaswamy一齊領導。馬斯克主張小政府、低稅收及放寬監管嘅自由主義，提出大削地方政府支出，希望為政府帶嚟「衝擊」。馬斯克成為特朗普政府管治團隊成員，憑佢喺商界嘅經驗及戰績，係咪可以幫到美國政府慳錢？
思博資本高級合夥人張宗永指，馬斯克睇法的確係與眾不同，但因為佢嘅做法會影響現有勢力嘅利益者，所以只可以對部分政府部門實施，例如美國太空總署(NASA)係公認最多冗員，效率又最低，馬斯克旗下SpaceX送火箭上太空嘅成本，只係佔NASA開支約10%，如果將部分生意轉移去SpaceX，絕對係一舉多得，一定幫到美國政府瘦身。
