【now.com財經】噚日指數實在太悶，估計大家都係喺度等NVDA嘅業績，所以揀咗隻輝達Call(10319)出嚟，睇下績後出嚟有無得跟炒食一水。
今朝睇返NVDA嘅業績，第三季淨利潤同每股盈利都勝預期；不過「勝預期」根本就係「市場預期」，因為市場係預咗佢會「勝預期」。
所以市場嘅焦點就落咗喺「新晶片Hopper及Blackwell系統存在一定的供應限制」，呢句嘢係NVDA自己講嘅，亦都係市場「無預期」到嘅嘢，咁就對股價出現壓力啦，美股收市後NVDA股價一度跌逾4%，最終都要見跌近2.5%。
本身噚日見NVDA日線圖出陽燭過10/20線，諗住股價可以借到績優再上，挑戰多次約149美元嘅築頂位；而依家見NVDA股價，收市價145.89美元計，都仲守得住10線(145.81美元)同20線(142.55美元)，Slow STC(14.3)兩線見轉向上，咁(10319)都可以小注一博。
(10319)咩位入真係無乜所謂，因為根本都無乜嘢要趕。如同平時一樣喺出文後再用10分鐘時睇完文先入都可以，但申重呢單嘢真係小注好啦。
再睇返恒指，今朝指數跌58點開市，報19,646點，五分鐘圖見一個裂口向下合理；但小時圖見指數又跌返落去中軸線呢...指數11月18日上返小時圖中軸之後，至依家一直都處於呢個保歷加上升通道裡面。
如果呢條中軸係咁硬淨守得住指數嘅話，咁指數一到呢條中軸線出好倉，短線Keep住借條頂線，喺呢個區間游走下算啦。
恒指牛(61083)，收回價19,220點，同現價有約450點唔好企咁近，指數呢一刻仲見好淡瘋狂爭持中，一陣失心瘋爆單邊撳都撳唔住就煩啦，槓桿都有35.1倍夠做Day Trade，低街貨都係另一個賣點。
依家9點58分，出得文再睇得嚟都10點打後，到時自己再睇多次個小時圖，睇下呢個「平頂三角形」仲有無得玩先好出貨呀。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
