【Now財經台】奢侈品牌集團LVMH收入除日本外嘅亞洲區佔比最大，接近31%，當中又以內地市場最大。不過，內地的奢侈品銷售轉弱，LVMH股價今年都要跌，但係咪仍然係奢侈品股首選？
iFast Global Markets副總裁溫鋼城指，LVMH主要客戶群係來自內地，但內地經濟及消費轉弱，部分有錢人由「唔貴唔著」變成著多咗日本平價品牌。LVMH股價今年暫時累跌逾20%，但年底前有聖誕消費旺季，或會幫到LVMH股價，佢估計，LVMH股價喺680美元水平會有阻力。
至於另一隻奢侈品股Hermes股價今年累升逾4%，集團配貨制度有利盈利表現，但其實增長都放慢咗，始終內地消費轉弱，對依賴內地市場嘅品牌影響亦較大，相反，喺內地佔比較細嘅品牌，消費轉弱嘅影響亦較細，例如普拉達(Prada)(01913)，股價今年都升得唔錯。
如果想投資奢侈品板塊，佢建議要分散投資，唔好只買1隻股份，同埋要留意公司嘅目標客戶群，揀地區比商品更重要，可以考慮揀唔太著重內地市場嘅品牌。
