【Now財經台】本港最新失業率微升至3.1%，有逾12萬人冇工開，但遠低過疫情期間，亦低過2003年「沙士」及2009年金融海嘯，本港失業情況係咪唔算好差？其實本港經濟更大挑戰係人口老化問題，近年政府不斷希望透過吸納海外人才去解決呢個問題，方向係咪正確？
資深經濟分析師羅家聰表示，如果睇返本港職位增長，其實比以往弱好多，好多人冇人工加，就算加又追唔追到通脹？呢啲都係好重要，佢形容依家經濟係處於一個呆滯狀況，當經濟增長持續偏低，就算全民就業經濟都冇活力。佢又話，睇返昨日(18日)嘅失業數據，見到涉及藍領嘅數據，打工仔飯碗開始被科技如人工智能(AI)影響，只係情況冇美國咁明顯。
至於人口老化問題，KC認為，香港喺吸引人才方面冇大問題，唔少係高學歷及專業人士，問題係呢方面嘅職位唔多，都聽聞唔少高才通話搵唔到工，所以唔係輸入人才嘅方向問題，而係香港欠缺相關活力。
