【Now財經台】美國今晚(13日)會公布消費物價指數(CPI)，通脹數據出爐前夕，美元獨強，美匯指數一度突破106水平，市場預期，美國10月CPI同9月差唔多，CPI數據對美匯指數有咩影響？勝出美國總統大選嘅特朗普(Donald Trump)正積極組班，內閣人選亦陸續公布，唔少都係對華立場偏鷹，美元後市會點走？
東亞銀行財富管理部高級投資策略師黃燕娥指，美元上升幅度及速度都因為特朗普當選明顯提升，美匯指數亦一度升穿106水平，市場認為特朗普嘅政策會推高美國通脹，加上關稅政策會令歐元區及中國受影響，令歐元大幅回落，喺呢兩個因素影響下，令美元變得強勢。
Angela又估計，雖然今晚出爐嘅CPI唔會有太大驚嚇或驚喜，未必對美元有太大影響，但睇返美元技術走勢有下行壓力，但相信美匯指數喺104及103水平會有支持。
