【Now財經台】鴻騰精密(06088)股價今日(13日)逆市飆，一度抽升逾22%，高見3.16元，集團上季持續經營淨利潤按年增長近24%，自從第1季成功扭虧後，盈利持續大幅增長，復甦速度非常理想，呢個勢頭可唔可以持續至今季？鴻騰股價喺中期盈喜後，一度衝上約3年半高位，但之後反覆回落，10月初開始因為受英偉達(Nvidia)嘅消息帶動，又有返炒作氣氛，後市係咪有望再向上收復？
南華金融集團副總裁莫灝楠指，鴻騰今季唔止係復甦，而係爆發期，其中一個主因係Nvidia嘅Blackwell晶片大量出貨令鴻騰受惠，佢認為會出現一個誇張嘅周期。值得留意係，鴻騰今日成交金額逾5.7億元，對上一次錄得咁大成交係10月9日，當日大市非常弱勢，但鴻騰現時仍可企穩當日嘅低位，反映鴻騰股價依家係1隻強勢股，好大機會向上突破，投資者未來要留意Nvidia稍後公布嘅業績。
Casper又指，鴻騰股價暫時喺2.5元至2.6元水平有支持，現價距離前高位3.29元，唔夠10%，上望3.95應冇難度，但要留意公司市值唔大，投資者要注意倉位大細。
