【Now財經台】中教控股(00839)發盈警，拖累股價今朝(13日)裂口低開逾8%後，跌幅一度擴大至逾20%，成交股數較過去100日同時段平均大增16倍，暫時成交金額逾2億元。
公司昨日(12日)收市後發盈警，預告8月底止全年，最多少賺逾72%，盈警通告解釋，淨利潤大跌主要同非現金減值、商譽減值有關，涉及最多17.5億人仔。
中教股價今日跌至約7個月低位，14天相對強弱指數(RSI)落到30樓下嘅超賣水平，但股價仍反彈乏力，在大市氣氛欠佳下，後市好大機會反覆尋底，下一個支持位睇3.5元，再低啲就睇3.3元水平，即年初見過嘅歷史低位。
集團預期今個月公布全年業績，麥格理指，要留意公司喺盈利大跌下，係咪會繼續派息，同埋全年學生增長可唔可以達標。
