【Now財經台】特朗普(Donald Trump)打贏今次美國總統選戰，出錢出力瞓身力撐嘅「浸粉」、Tesla行政總裁馬斯克(Elon Musk)本人及Tesla股價肯定係另外兩個大贏家，自11月5日大選後，Tesla股價已累升逾20%，市值進帳約2000億美元，據《彭博》億萬富豪指數顯示，馬斯克淨資產喺呢段時間多咗500億美元。
美股昨晚(12日)喺通脹數據出爐前，由於美債息抽高，拖累3大指數全線低收，Tesla股價都要回一回氣，但投資者不妨諗下趁機執下平貨，事關Wedbush Securities分析師Dan Ives喺Tesla股價狂飆後，發報告唱好股價，又將目標價調高至400美元。依家Tesla股價喺328美元水平，如果現價買貨，真係上到400美元，都賺超過20%，睇返美股、比特幣(Bitcoin)呢啲「Trump Trade」受惠者，大贏家Tesla股價應該仍有運行。
