【Now財經台】評級機構穆迪(Moody’s)指出，特朗普(Donald Trump)贏咗美國總統大選後，會令華府財政風險進一步升溫，而美國國債相對於國內生產總值(GDP)佔比近年仍處於高水平。此外，美國10年期債息喺大選後，一度升穿4.3厘，美債佔GDP比例及美債息走勢係咪都要繼續關注？
獨立市場策略師陳俊文表示，投資者唔使太擔心，美債佔GDP比例已連續3年輕微好轉，雖然特朗普嘅競選承諾之中，冇具體控制赤字嘅措施，但加關稅可增加財政收入，所以要留意特朗普會唔會全球性咁加關稅，雖然其他減稅措施都會有影響，但如果可以刺激經濟增長，亦可抵銷部分影響，總括而言，美國仍未陷入一個好嚴峻嘅財政危機。
Norman續指，過去兩年，股市未見顯著上升，過往債息升至4.5至4.7厘時，都未對股市構成太大壓力，雖然大選前美債息向上，但大選後回落至4.3厘，反映特朗普因素唔會大幅推高美債，美國正處於減息周期，相信通脹會繼續緩和，只要減息步伐穩定，美債息大升機會唔高。
