【Now財經台】截至早上11時止，過去1小時內《彭博》用戶搜尋量最多港股，依次為東風集團股份(00489)、復星國際(00656)、融創中國(01918)、中國宏橋(01378)及紫金礦業(02899)。
東風上周二(5日)出咗10月銷售數據，其中，新能源汽車銷售按年跌逾10%，表現明顯差過同業，所以股價都跑輸同業，不過，東風股價已經連續兩日喺大成交下抽高，有咩要留意？
富途證券首席分析師譚智樂指，東風情況比較特別，因為公司冇特別受歡迎嘅汽車品牌，股價一直等緊一個轉勢機會，所以唔可以將東風同整體車股比較。佢又話，依家傳統嘅落後汽車品牌出新車時，普遍都會同華為合作，並會用華為嘅無人駕駛系統，不過，值得留意係，一旦全部汽車品牌都用華為嘅系統，所謂獨有優勢就會淡化。
股價方面，Arnold指出，雖然睇返技術走勢，東風昨日(11日)以大陽燭抽升，今日亦保持到升勢，但去到3.6元水平，升幅已明顯放緩，佢提醒短線需要小心，有貨可以繼續揸住，冇貨就唔建議依家買入。
