【Now財經台】比特幣(Bitcoin)價格繼續受惠於「Trump Trade」，昨日(10日)更衝破81000美元，睇返依家嘅走勢，破頂後仲可以升到幾高，似乎都好難估計，有冇機會見10萬美元？特朗普(Donald Trump)講明撐虛擬貨幣，仲話要建立Bitcoin戰略儲備，特朗普將會喺明年1月上任，立法又要過關斬將，應該都唔會喺短期內成事，Bitcoin價格近期走勢係咪開心得太早？
獨立外匯商品分析師譚家康指，Bitcoin價格之前由3月約72000美元，回落到7月約53000美元，現時又升至81000美元，佢認為仲有上升空間，估計可升至95000美元。
佢又話，特朗普當選美國總統，加上參眾兩院好大機會由共和黨同時控制，所以Bitcoin相關法規可以好快完成審批及立法，估計將會令投資者更易涉獵Bitcoin投資，流通性將會愈來愈高。
