【now.com財經】今日「雙11」，不過依家啲商家將啲節日嘢全線向前推，10月中已經玩緊「雙11」，無他嘅，提早谷個消費濃厚氣氛出嚟等大家買多啲啫；正如我屋企樓下個商場，之前Halloween都未開始就已經set好晒聖誕節嘅裝飾，被人笑不如所有節日嘅裝飾擺晒出嚟算數啦。
今朝恒指開市先嚟一個跌400幾點嘅裂口，指數一下子落到去202嘅水平，將牛證首五層街貨全數收回，呢度夾埋有相當於2,403張期指街貨。而依家10點10分，指數最低見過20,202點，其實都可以將20,200至20,299點呢層嘅街貨都當佢無咗，係仲有20,200點收回嘅牛未死嘅，但係如果你有在手的話，你會唔走咩？加埋嗰層嘅708張期指街貨，咁就當今日有311張期指街貨被收回。
依家10點15分，其實作戰室到依家都仲未斷定到可以出注乜嘢去追，睇返個五分鐘圖就明架啦，卡住100點嘅長方形嘅同時，仲要係一陰一陽嘅燭出嚟，完全係玩唔到。就算想借小時圖出「倒轉錘頭」比好倉，但指數實在太躺平啦，躺平到10點22分終於見指數向下失20,200點。
恒指熊(59591)，收回價20,750點，同現價有約500點距離，成交活躍走動易，約35.5倍槓桿亦夠Day Trade用，不過呢一刻出淡倉係硬追嘅，小心五分鐘圖Slow STC(14.3)見觸底，因為保歷加通道都見向下。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
