【now.com財經】噚日揀咗隻恒指牛(57590)出嚟，本來諗住等五分鐘圖10線企好出動，不過出文+睇完文之後指數都已經變咗樣，疊埋心水等返五分鐘圖Slow STC(14.3)出觸底Swing返上去，終於喺噚日下半場1點35分等到啦！(真係等到痴呆)
同以10分鐘作為落場買貨時間的話，於1點35分起計10分鐘，期內(57590)高低位做過0.042元/0.039元，平均買入價為0.0405元。
真係乖乖地做轉Swing Trade就算，喺2點10分見Slow STC(14.3)兩線上到超買位嘅同時，圖上面比咗支陰燭出嚟，(57590)起身啦喂！同以10分鐘走貨的話，按期內高低位做過0.047元/0.044元，平均走貨價為0.0455元，唉~ 搵食艱難，呢一趟平均快執5格或10.99%，咁嘅市唔爬格仔都唔知做乜好。
今晚喺地球嘅另一端開始進行投票，maybe依家都已經有啲細州開始進行投票，預咗今日港股都係悶局等投票結果之下，指數見跌157點，開市報20,409點，呢口價擺位仲以為會向下落多9點，將20,400至20,499點嘅牛證全數收回。
以日線圖見指數同牛熊兩邊重貨區相隔雖然只係500點左右，不過喺未有更合適嘅借口出現之下，或者對指數嚟講行50點都多；所以拉到最近用牛熊兩邊最貼價嘅街貨層，即係20,400至20,499點同20,600至20,699點呢個範圍玩住先。
10點未到指數一度抽高見高位20,644點，作戰室今朝第一注本來以淡倉應市，但開市價=暫時低位，所以都即刻變陣出好倉，見過20,600點，又等到指數跌轉升，晨早陸續進行收割。
10點打後見小時圖終於都成功重上五條主要平均線，不過喺2063X點呢個位亦都有條頂線喺度，位置唔多但如果指數企得住最近嘅100線向上突破呢條頂線的話，則有望可以借到整條向上嘅保歷加通道再慢慢向上搖上去，順便帶埋Slow STC(14.3)確認到超買位。
今日真心唔容易玩，小注大槓桿恒指牛(58104)，收回價20,270點，同現價有約321點距離，所以槓桿有成50.2倍咁多，屬附近收回價中高槓桿、低街貨嘅一隻。
博埋五分鐘圖見保歷加通道口拓闊，迫Slow STC(14.3)出超買再超買可以嘅，我只係擔心到出完文你再睇完之後，唔知個市會變成點啫。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
