【now.com財經】咩都未講之前，提提大家今個星期二(5日)美國大選(人哋地方大，隨時有啲州份提早投票)，緊接嘅係星期三&四(6日&7日)美國議息日；順帶一提，噚日美國已轉咗做冬令時間，炒美股嘅你今晚開始要夜少少先瞓啦。仲有，人大常委會第十二次會議今日開始至星期五(8日)喺北京舉行。咁多嘢聚埋喺今個星期發生，趕過英超快車；而隨市個市悶到趴喺度。
今朝恒指開市升78點，報20,584點，正常發揮未見有特別。如常喺U盤時間同作戰室嘅戰友一齊睇返啲圖，見五分鐘圖上Slow STC(14.3)兩線已經上到超買位，所以今日都無再順U盤出動好倉，反而用淡倉做第一注，見指數忽然大拓向下再拿拿聲抽返上去，同上個星期嘅初段時間好似，又係大巴上大巴落。
依家仲有8分鐘先至10點，喺小時圖上見到指數出現「十字星」卡住喺100線同10/20線之間，Slow STC(14.3)於中軸水平有見橫向，換保歷加通道口有見收窄，Swing係仲有得去不過應該都係被線卡住嘅多。
10點後嘅小時圖都見仲係被啲平均線卡住，但暫時先10線/中軸算是有支持接住指數，而如果用50線(10點6分時約20,569點)同10/20線(20,496/20,461點)呢個罅位嚟做Swing的話，拉到最盡都只係得100點左右。
細波幅就唯有搭高槓桿證嚟爬格仔，恒指牛(57590)，收回價20,180點，同現價有約366點距離，約45.7倍槓桿一啲都唔弱仲要低街貨，借一借五分鐘圖嘅10線企好而出動啦。作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰教室七日免費體驗：https://www.patreon.com/join/cbbcwar
