【Now財經台】澳門今日(1日)出咗10月賭收數據，按年增長6.6%至207億澳門元，更創咗內地新冠疫情封關後單月新高，喺內地經濟仍然疲弱下，係咪都算交到功課？
亨達財富管理董事總經理姚浩然表示，相比起疫情前日均賭收逾8億澳門元，或者高峰時逾12億澳門元，10月日均賭收只係6.7億澳門元，其實唔算太理想，僅相等於疫情前約80%。不過，由於10月有國慶長假期，所以平均博彩收益比較好都唔意外。
佢又話，內地近一兩外遊嘅人明顯多咗，澳門旅客量亦增加，帶動賭場人流令賭收有改善，但依家最大問題係，過往賭收高企時，主要靠啲金礦主，呢啲人係好有錢會帶錢去澳門賭博，但呢啲人依家較難拎巨款去澳門，所以賭收好難上返以往高位。
